盛傳雙喜臨門的徐淑敏（Suki），昨日與宋熙年出席《戀上綠色新煮意》活動，並示範烹飪絕技。身穿紅色Deep V裙的她，逼爆上圍搶盡風頭。雖然未婚夫黃浩日前親證明年做老竇，但Suki昨日除腳踏四吋高踭鞋現身外，更主動澄清並非懷孕：「點解唔着得高踭鞋？我又唔係有咗，結婚就會。」問她是否因為廣告合約才「有口難言」，她只一味否認懷孕，但言談間流露恨做媽咪：「我嘅身體好Ready做媽咪，亦希望盡快生，我想生兩至三個。」

兄弟團：郭品超鄭元暢

說罷Suki更主動扯開話題講結婚：「應該11月中結，不過驚撞台慶，所以諗過12月，但要睇Book唔Book到酒席。」再追問如此急結婚，是否「奉子」之名，她只說：「夾就結，我覺得佢大我12年唔係問題，我講唔出點解鍾意Kenny，如果講得出嘅，我只係鍾意佢嘅優點。」她又強調嫁Kenny絕非為錢：「我嫁人唔係嫁錢，講我為咗錢而嫁，有少少侮辱！」Suki否認收下價值80萬元的Tiffany婚戒，並透露婚後將搬近Kenny家人附近居住。

談到結婚，Suki透露將找呂慧儀、馬賽及姚子羚等組成6至8人的姊妹團，又指戥穿石全部皆是靚仔，包括郭品超、鄭元暢及鈴木仁等。雖然談婚事談到笑不攏嘴，但對於求婚過程卻不願多提：「總之發生喺一個浪漫嘅地方，佢叫我嫁畀佢。（跪地、送花同情歌？）都有啩！」

媒人麥玲玲：驗孕驗過有

縱然Suki落足牙力否認懷孕，不過「準新郎兼準爸爸」Kenny及媒人麥玲玲卻對其言論大感驚訝，一致表示要致電Suki了解詳情。Kenny甫得悉Suki否認懷孕，第一反應即O嘴說：「吓？佢驚小器呀？」自知說漏了嘴，他隨即以與Suki欠缺溝通為由避開話題：「總之佢講咩就係啦！我哋呢排好少溝通，今日都有成六個鐘冇講電話，我要打電話問清楚佢。」至於麥玲玲亦說：「吓？據我所知應該係有喎！上次我哋食飯，Suki好小心，咩都唔敢食，而且之前佢用驗孕棒驗過係有嘅，冇理由咁兒嬉，等我Call佢問清楚。」麥玲玲及後主動回覆記者，表示Suki單方面否認懷孕，是礙於有廣告合約在身，才不便親口證實做媽咪：「或者等三個月穩定咗，佢哋先再一齊講啦！」

而昨日活動結束後，Suki自行驅車返回青衣父母寓所，並禮貌地向記者揮手道別：「你哋收工啦！我返屋企食飯咋！」而忙於為Suki聘請新司機的Kenny，昨晚八時乘坐Hummer抵達Suki家，並帶同一大袋「斬料」拜會未來外父外母，相信亦為趁機當面與Suki「加強溝通」。