黃翠如公開與蕭正楠的戀情後愈見甜蜜,昨日宣傳劇集時喪笠男友高帽,稱彼此從未嗌交,又讚男友又「腍」又好恰,不過她否認是野蠻女友。而黎諾懿否認《愛.回家》結局抽朱慧敏水,指劇本早已定好,朱慧敏亦有望再演出該劇。

翠如和阿聰在劇中吵大鑊,不過晒命話現實中冇同男友嗌過交!

黎諾懿力撐劇集沒有抽朱慧敏水。

吳業坤與龔嘉欣挽手上台,笑得幾開心!

黃翠如、張繼聰及黎諾懿等昨日宣傳新一輯處境劇《愛.回家》,新加入的翠如透露日前與阿聰拍攝了一場激烈嗌交戲,不過現實生活與男友蕭正楠從未嗌交,大讚男友「腍」,非常肉麻!問到平日是否恰對方?翠如笑說:「係呀!冇計啦!依家幾好,好似返到考會考咁,一齊溫書讀劇本,佢啱啱返嚟,不過曬到好黑!(你係野蠻女友?)唔係,唔使去到呢個地步,佢好乖。」

阿聰婚後熄晒火

阿聰則透露未婚時性格暴躁,但與太太謝安琪相處久了,體會到每每有事發生,錯的一方定必是他:「係咪都係我番佢,我發現發脾氣力度同嘅時間成正比,佢成日同我講生仔好辛苦,又時不時話佢爸爸有幾好幾溫柔,我係演員識聽嘅!」

朱慧敏隨時回家

至於諾懿被問到劇中女友朱慧敏於結局篇的對白談及對婚姻的睇法,似在反映現實,無被指有抽水之嫌,諾懿即力撐:「唔關事,本身個劇情係咁去,拍完先發生件事,冇話邊個抽邊個水,咁啱啫!(但佢一句對白都冇!)原裝係咁,拍之前一兩個月收劇本,依家當係第一季完,其實啲演員第二季都喺度,所以朱慧敏都有機會,大家唔需要太介懷結局。(有冇聯絡佢?)冇,都唔夠膽問,成年人自己識處理,有需要佢會打畀我哋。」將於月中拍新劇的他,透露今日與太太到布吉二人世界,但造人計劃要待11月度蜜月時才實行。