李克勤早前登上郵輪玩樂,在巴塞隆拿途經超開放式天體沙灘,自爆親眼見到裸男裸女「揈吓揈吓」,更見到裸男表演倒立,經歷難忘假期!

克勤在17層樓高的郵輪上飛越,相當刺激!(唐豁莊攝)

克勤在巴塞隆拿誤闖天體沙灘,令他大開眼界。(唐豁莊攝)

克勤與太太盧淑儀早前在歐洲過了兩星期郵輪假期。(唐豁莊攝)

李克勤、狄易達、陳慧敏及羅孝勇等昨日出席活動,剛在歐洲過了兩星期郵輪假期的克勤,自爆在巴塞隆拿誤闖「天體沙灘」:「踩單車咁啱見到,個沙灘就喺路邊,男男女女就咁揈吓揈吓,之後都習慣咗,但去到還車嗰下,我見到個冇着衫嘅男人做緊倒立,我冇諗過啲嘢到底係點擺!然後我同啲小朋友講,呢啲香港唔係咁適合㗎!」問到可有趁機「大解放」?他笑言怕嚇親人,只可以戴着黑超路經時偷望。

講完「天體奇遇」,克勤大讚郵輪設施一流:「我發夢都估唔到架船咁大,入面有籃球場又有得滑浪,仲有繩索,架船有17層樓高,我就喺17層樓咁高飛過。」

自責丟低祖兒

克勤又自責度假兩星期,感覺如丟低了即將一齊舉行演唱會的容祖兒:「覺得有啲唔好意思,但旅行係一年前已經計劃好,聽聞佢都喺內地拍緊嘢。」

而狄易達談到早前於MV中露出粉紅底褲,他笑說:「冇諗過最後個焦點去咗條粉紅底褲度,早知買條貴少少。」他又表示將有新版MV,會在一個賽車場取景,並自爆因為開車開到時速160公里而膽戰心驚!