佔領行動後首場大戰係年底區議會選舉,不論建制、泛民政黨都準備大灑銀彈搞選舉工程,其中被視為泛民龍頭嘅白鴿黨忽然富貴豪擲七百萬元,買入荔枝角區一個千幾呎嘅工廈單位,兼豪花一百三十萬裝修太子總部,使錢一啲都唔手軟。白鴿黨喺區選前夕仲大手筆裝修又置業,唔通白鴿黨又搵到「金主」或大水喉,唔愁選舉銀彈?

值七百萬元嘅新買單位。

太子總部花咗百多萬元裝修。

設計圖片及對白

白鴿黨尋日喺總部公布總部裝修同購入新單位用作創意媒體部辦公室嘅消息,據知新單位係舊年九月以約六百八十萬買入,再花五十萬裝修,新單位業主同持有白鴿黨太子總部公司相同,名為Sound Factor Limited, 該公司過往由多間公司另加多名白鴿黨核心成員做股東,包括外號「AV仁」嘅白鴿黨前主席何俊仁。

學民被加租要搵竇搬

主席劉慧卿話太子總部用咗二十幾年,設施已好殘舊,該黨一直想物色一個四千至五千呎嘅地方做新總部,但樓價太貴,所以改買細單位,再裝修現有太子總部。但大筆裝修同置業錢從何而來?司庫袁海文解釋,喺五年前已開始傾搬辦公室,多年嚟儲落唔少儲備金,雖然今次數目唔細,但儲備基金都夠找數,亦冇乜大水喉支持,自言唔會買個物業就唔夠錢做選舉,否則點同市民、支持者交代呢?

談及區選選舉經費來源,卿姐話主要來自市民同黨友支持,而早前白鴿黨落區賣獎券時市民反應好好,雖然未埋數,但佢都好有信心,仲話市民畀得錢就會畀埋選票支持。

另一方面,學民思潮召集人黃之鋒尋晚轉貼學民社交網站內容,話喺荔枝角嘅學民總部今年九月租約期滿,收到業主來信要求加租,故有意搵一千六百呎以上嘅「廉租單位」,須位於觀塘線或荔枝角至尖沙咀港鐵沿線,「現請好心人推薦新單位」。據悉業主想由月租二萬一千元,增至二萬五千元。有網友反建議學民可以搵剛買新單位嘅白鴿黨協助,黃之鋒回覆話學民唔會接受政黨捐助。

第一手消息請下載on.cc東網iPhone/iPad/Android/Windows Phone Apps