後日係名模黃佩霞正日生日,佢前日同一眾友好提早慶生,仲唔介意公開年齡,透露今年係五十歲生日:「今年『大冧巴』,五十歲喇,爸爸媽媽同妹妹,仲有好多親戚都嚟晒香港,以往唔係成日搞,今年家人同朋友都喺香港,所以老公(Ryan)決定幫我搞生日,佢仲炮製咗影片,輯錄我由細到大嘅成長過程,仲搵朋友即場做廣東話翻譯,好感動。」

黃佩霞(中)獲好友周美鳳(左起)、琦琦、洪華及馬詩慧慶生。

前晚出席嘅名模好友成六十人咁多,佢一早叫朋友唔使送禮,以免浪費,寧願佢哋將心意做善事,佢話:「我同老公之前去過緬甸,認識咗一位住喺當地嘅澳洲人,知道緬甸仰光有間學校,大部分係橡膠樹工人嘅子女就讀,間學校缺錢修葺,依家仲爭兩萬美金(約港幣十五萬六千元),我哋好想幫忙,所以我叫晒啲朋友唔使送禮,希望佢哋將心意捐做慈善,一個生日會就已經籌咗幾萬港元。」

第一手消息請下載on.cc東網iPhone/iPad/Android/Windows Phone Apps